هنا مساحة خالية من الهري

دة اول بوست ليا هنا، بوست؟! لا هنا مسموش بوست... مش عارف اسميع ايه بس بوست دي بتتقال على اللي بتكتبه على مواقع التواصل الاجتماعي و غالباً معظمنا بيكون بيكتب حاجة الناس تهتم بيها و تعجبها و الكلام دة حتى لو مش هتعجبه هو! اهتمينا قوي باهتمام الغير و نسينا نفسنا... نسينا نكتب لنفسنا و نكلمها، عشان كدة عملت المساحة دي، لنفسي.

هنا مش مطالب اكتب حاجة و اخد بالي من كل كلمة و طريقة كتابتة جملي لحسن حد يفهمني غلط. هنا اقدر اقدر اللي عايزه و يعجبني او لا مش مهم، المهم اني كتبت و طلعت اللي جوايا.

من زمان و انا بحب الكتابة، شوية شِعر... على قدي طبعاً... لسة فاكر اول قصيدة كتبتها، كنت تقريباً في رابعة ابتدائي، كانت عن فلسطين.... اوووف كانت ساذجة جداً.... و كنت ساذج... كنت فاكر ساعتها اننا كشعب بنجمع بعض من كل الدول العربية عشان نروح نمشي الصهاينة اللي هناك... كان اسم القصيدة "رسالتي إلى فلسطين - بقلم الشاعر عمرو محسن" :D يوميها رحت المكتبة اطبع منها ١٠ نسخ و اوزعها عليهم في البيت :D لسة لحد دلوقتي معايا نسخة ممكن ابقى انزلها.

كتبت كتير بعدها بس حاجات مش قد كدة و حتى ايام الكلية كنت بكتب، تقريباً كل كتاباتي كانت انتقادات لحاجة او وضع فيه بس مكنتش بكتب إلا و انا في حالة هيجان داخلي جوايا و متعصب و على اخري. فاكر مرة اتعصبت جامد في محاضرة و الدكتور بيشرح لسبب ما قمت خرجت و كان معايا مجرد قلم، نزلت اتمشى احاول اهدى شوية و حسيت اني محتاج اكتب، يوميها كتبت على ايدي من اولها لاخرها و مرة تانية اخدت المايك من الدكتور و قلت اللي كتبته. معظم كتاباتي في الكلية كانت انتقاد لاسلوب التعليم او هجاء في دكاترة معينة، هبقى انزل اللي كتبته في الاخر لو عندك فضول تقرا.

بس كانت في جملة دايماً بقولها ايام الكلية، "انا طالب علم مش طالب درجات". كنت كل ما امشي ورا الجملة دي و انفذها كانت درجاتي و تقديري بيقل :D و دة اكبر دليل على فشل التعليم، انا شايف ان حل مشكلة التعليم هي ان الناس تتعلم ازاي تتعلم اصلاً لوحدها و عندهم الانترنت بشوفوا عايزين يتعلموا اية و دة طريقة ماشى بيها عدد كبير جداً من الناس اللي حققوا حاجة و غيروا في العالم. اعتقد اني ممكن في مرة ابلوج عن معاناتي مع الموضوع دة و اللي مريت بيه و اية الحلول اللي ممكن تغير فكرنا عن التعلم في البلد دي.

في اخر سنة في دراستي تقريباً بطلت اكتب تماماً و بقيت عملي اكتر عشان اهتم بمستقبلي العملي و الشغل و احلامي و الجو دة كله و لحد دلوقتي اعتقد ان دي بقت طبيعتي بفكر بالمنطق و بالارقام، قليل لما بتعصب او مشاعري توصل لحالة من الهياج الداخلي اللي يخليني اكتب. بس حسيت اني نسيت حاجات كتير منها اني احس كفاية او اعبر عن اللي جوايا دة غير اني شايف ان البلوج دة ممكن اخلص فيه تجاربي و خبراتي اللي وصلت ليها و اسجل فيه اللي نفسي احققه، يعني ببساطة يكون السورس كود بتاع السوفت وير بتاع مخي :D اي حد يقدر ي run الكود دة و يشغلني عنده. دي فكرة جميلة جداً والله، انك تقدر تاخد نسخة من الكود اللي اتكتب بيه كل شخص عشان تعدل عليه او لما يوحشك تشغله و تقعد تتكلم معاه، محدش كدة هيموت بس هنقى برامج ساعتها :3 . 

مش مهم دة دلوقتي سيبك من كل دة، لو عايز تقرا اللي كنت بكتبه ممكن تبص عليه من هنا و هنا و هنا.

تصبحوا على خير.... اها صح، الصورة دي كانت اول مرة ليا اذاكر برا في نادي في اول سنة في الكلية، كانت مادة اسمها discrete math المهم ضفتها اصلاً لية؟ عشان دي كانت مساحة خالية من الهري :)